Hartklop in kakie

Ek het myself al telkens uitgelaat oor die vindingrykheid waarmee goeie romanseskrywers, binne die beperkings van die genre, met interessante invalshoeke vorendag kom. Ek moet sê dat dit wel die eerste keer is wat ’n kortbroek so sterk figureer dat dit byna ’n volwaardige karakter word. Ek verwys natuurlik na die nommertjie in kakie, waarna die heldin, Megan, verwys as “Daardie verspotte kortbroek!” (p.27)
Die prominensie van die klein kortbroekie waarin die aantreklike Eckhardt oral gesien word, skakel baie goed in by die agtergrond waarteen die verhaal ontplooi. Die modewêreld, met eksentrieke ontwerpers soos Erick K-man, onderkruipery, ontwerpe wat gesteel word, die druk en kompetisie van groot geleenthede, soos die tersaaklike Modeweek – dit alles gee die leser ’n gawe kykie in ’n milieu wat nog nie tot vervelens toe aangebied is nie.
Dit was interessant om te sien hoe die sagte aanslag van Eckhardt algaande deur Megan, ’n hardvogtige advokaat wat spesialiseer in “Fashion Law”, se skanse breek. Die omgewing dra ook by, ’n gasteplaas waar die Kellermans woon en werk. “Wat gaan aan met haar in hierdie plek? Word sy sag?” (p.46)
Felicia Snyman is ook ’n gesoute en veelsydige skrywer. Buiten haar talle Romanzas, het sy ook suksesvolle kinderboeke geskryf, die nuutste waarvan Benru se boomskok, die mark van 11 jaar en ouer teiken.