- EB CORPORATE |
- EVENTS |
|
FREE delivery to all EXCLUSIVE BOOKS stores nationwide. FREE delivery to your door on all orders over R450. Excludes all international deliveries.
|
We will notify you on events like Low stock, Restock, Price drop or general reminders so that you don’t miss the deal
Louise Viljoen is ’n vryskutresensent, taalpraktisyn en sommer alles wat met woorde te doen het. Haar geloof, omgee vir mense en haar sagtheid het uiting gevind in haar boek, Gesinstyd met God, wat in 2022 deur Luca gepubliseer is. Ek het met groot verwagting uitgesien na haar eerste roman, en wel in die geestelike fiksie genre. Niks kon my egter voorberei op die hou-in-maag-inpak van Toevlug nie.
In die Kongolese reënwoud word die sendingstasie waar Evert en Petro Mentz arbei, deur ekstremiste onder leiding van die wrede kolonel Ahadi Idi Nyoma, bekend as La Hyène, Die Hiëna, aangeval. Die terreur word nie versag nie, ook nie die ontsettende ontbering wat wag op Petro, wat wonderbaarlik die aanval oorleef nie. Wanneer sy uiteindelik ’n holte vir haar voet vind op Toevlug, noem sy haarself Mara, vanweë die bitterheid wat sy voel jeens die Here wat haar versaak het.
Die skrywer konfronteer haar lesers met die krisis waarmee baie mense worstel: waarom laat die Here toe dat slegte dinge met mense, selfs goeie, godsdienstige, mense, gebeur? “Op die einde gaan dit oor goed en sleg… Soms wen die slegtes en dan wen die goeies weer… Daar hoef nie redes te wees nie…” (p. 205) Mara se wroeging bring haar nie uit by ’n antwoord nie, net by die kwelvraag: “Maar wat as die Here werklik bestaan? Wat as Hy werklik is?” (p.205).
Verder word ook die kwessie aangeraak van huwelike tussen gelowiges en dié wat nie die Here volg nie. Die aanverwante storielyn van Ida en Gary lig hierdie saak uit, terwyl Ida ook haar geloof verloor het, weliswaar onder ander omstandighede.
Die storie boei enduit, maar dit is veral die gebede wat woordeliks opgeteken word, wat my telkens aan die hart geruk het. Dit is Woordgefundeer en spreek van opstandige verset en soeke na sin aan die een kant, en ernstig intree vir die redding en genesing van trauma aan die ander kant.
Die aanbieding is sinvol verdeel vanuit die oogpunte van Petro, Mara, Riaan en Ida, wat die vernaamste rolspelers is. ’n Verskeidenheid randfigure, elkeen met ’n lewensverhaal van val en oorwinning, vul die storielyn aan en maak daarvan ’n besondere leeservaring.
Toevlug, deur Louise Viljoen, is weereens ’n publikasie van Luca, die geestelike druknaam van Lapa Uitgewers.
I am still enjoying the book, i thought it was a big book however a great read.
Die 2023 Lapa Jeugromankompetisiewenners se boeke is nou almal op die rakke. Die derde van die naaswenners, almal ewe boeiend, het nou in my hande beland. Annerle Barnard se inskrywing, Sterstof, is gepubliseer onder die titel, Donkerster, en is beslis een wat ek kan aanbeveel. Dit is nou as jy verby die ontstellende eerste hoofstuk kan kom.
Die skrywer deins nie terug van uitdagende onderwerpe nie. Sy hanteer onder andere kwessies soos die jag van geblikte diere, wildstroping en die algemene uitdagings van wildbewaring. Met die insig van iemand wat tieners verstaan, skryf sy oor boeliegedrag, haatpos en die isolering van tieners wat anders is as die gewilde norm. Carli Kirstein is briljant en het ’n passie vir wildbewaring. “Mamma, die enigste kere wat klasmaats my geselskap opsoek, is as hulle my vra om Wiskunde te verduidelik.” (p.31) Haar enigste vriende is haar Duitse, geek-vriendin, Hilda, en Sam, ’n albino. Die marginalisering van mense met albinisme is ’n onderwerp wat nie algemeen in romans voorkom nie en dit raak mens aan die hart. “Eintlik het elke mens ’n storie, en dis wanneer ’n mens iemand se storie hoor, dat jy besef dat jy saggies moet trap.” (p.102)
Benewens die spanning wat sommer gou-gou oploop met stropers wat al hoe nader beweeg aan Wild Cat Sanctuary, waar Carli en haar ouers betrokke is, is daar ook volatiele hartsake betrokke. Carli het byvoorbeeld gedink Wouter is haar sterstof, maar hy blyk toksies te wees. Die student, Werner, loop aanvanklik haar argwaan op die hals, en Stef, die ryk “ouer” man met die Porsche, se optrede hou mens aan die wonder.
Oor die dramatiese afloop van die krisis by Wild Cat Sanctuary gaan ek niks verklap nie. Kry gerus die boek, uitgegee deur Lapa Uitgewers, en beleef dit self.