Onvoorwaardelike liefde

As daar nou al ooit ’n onwaarskynlike liefde geskets is in ’n romanse, is dit die verhouding tussen Danika en Dewald. Dit kon skaars slegter begin, met sy ondeurdagte opmerking by die begrafnis van Danika se man. Maar dit is sy grysblou oë, en nie net die beskuldiging wat hy uitgespreek het nie, wat haar ry.
Die storielyn fokus sterk op skuld, aanspreeklikheid en die invloed van ander se oordeel oor situasies. Mens kan kers opsteek by Dewald, met sy nugtere uitkyk. Dit was egter juis sy geneigdheid om jammer te kry en te vergoed vir onreg, wat ’n tydelike wig tussen hulle ingedryf het.
Ek het nog nooit die voorreg van ’n ski-vakansie gehad nie, daarom het ek dit baie geniet saam met Danika en haar familie. Net genoeg inligting om die storielyn te ondersteun en Danika se vertwyfeling finaal stop te sit.
Ek het vinnig weer gekyk na hierdie skrywer se vorige twee Romanzas, Om die sterre te raak, en Waag en wen, en ek voel daar is ’n duidelike groei in haar skryfstyl. Onvoorwaardelike liefde verdien ’n ekstra ster van my kant af.
Die Romanza in die Moderne subgenre, is uitgegee deur Lapa Uitgewers.