Dierestories vir Slaaptyd: Soete Drome Saam Met die Groot Vyf

Na ’n besige dag was ek sommer lus om saam met De Wet Hugo en die klein diertjies rustig te raak. Dierestories vir slaaptyd is inderdaad ’n goeie resep vir soete drome, soos die buiteblad beloof.
Die teks is heel eenvoudig, maar spreek ’n paar belangrike dinge aan waaroor ouers en klein kinders lekker kan gesels. Die eerste daarvan is aandagafleibaarheid wat lei tot ongehoorsaamheid. Ollie beland letterlik diep in die moeilikheid omdat hy nie by die trop bly nie.
Die volgende is vrees vir die donker, en hier is dit ’n klein luiperdjie wat daardie bangheid moet oorkom. Ontmoet vervolgens vir Bertie, ’n buffelkalfie wat buite sy aard loop en knor en baklei. Hy moet leer dat mens soms in ’n slegte bui kan wees, maar dan moet dit hanteer word sonder om met ander lelik te wees.
Rienie is ’n skaam renostertjie wat eensaam is. Leer die kinders dat hulle gerus kan maats maak om nie alleen te wees nie. Louis is ’n baie woelige leeuwelpie, maar by mamma kan hy tot ruste kom.

Hierdie oulike stories is kunstig geïllustreer deur Kelly Brown. Dit is nommerpas vir voorlees en saamkuier en dan rustig slaap soos die groot vyf se dierekinders. Die lieflike volkleur prenteboek is uitgegee deur Human & Rousseau, ‘n druknaam van Jonathan Ball Uitgewers in Suid-Afrika.