Op my planeet: die beste rympies van Jaco Jacobs

Welkom op ’n planeet propvol pret! Jaco Jacobs se planeet is ’n vreemde, fantastiese, vrolike plek waar ENIGE iets kan gebeur. Daar kan wurms met tamatiesous op jou spyskaart wees … of ’n walvis kan in jou sop beland. Jy kan uitvind hoe ’n skoonheidskompetisie vir monsters werk … of die waarheid oor haaie uitvind. Jy kan ontdek jou boetie is ’n ruimtewese … jou troetel-dinosourus saam skool toe vat ... of ’n luislang kan jou ouma insluk! Daar is deesdae byna nie ’n eisteddfod, kunswedstryd of klaskamer in die land waar Jaco Jacobs se skreeusnaakse, lawwe rympies nie gehoor word nie. Sedert die verskyning van sy eerste rympieboek, Wurms met tamatiesous, in 2005 het ’n hele rits rympies uit sy pen gevloei. Hierdie reuse-rympieboek bevat van die gewildste verse uit Jaco se bundels wat oor die jare verskyn het, insluitende: * Wurms met tamatiesous (Alba Bouwerprys, C.P. Hoogenhoutmedalje) * ’n Brulpadda in my tas * My boetie dink hy’s Batman * Kougom in my hare * Op die punt van my tong: 80 tawwe tongknopers; En daar is ook ’n paar SPLINTERNUWE rympies as bonus!

Jaco Jacobs is die skrywer van meer as 140 boeke vir tieners, kinders en kleuters! Talle van Jaco se boeke, soos sy tienerromans Suurlemoen! en Perfek, is topverkopers, en twee van sy boeke is reeds verfilm. Meer as ’n miljoen kopieë van sy boeke is reeds verkoop en hy spog met talle bekronings, waaronder die Alba Bouwerprys, die CP Hoogenhoutmedalje, die Exclusive Books/IBBY-prys, die Tienie Hollowaymedalje en 24 ATKV-Kinderboektoekennings. In 2018 word twee van sy boeke wêreldwyd in Engels uitgegee: A Good Day for Climbing Trees en A Good Night for Shooting Zombies. Jaco woon in Bloemfontein saam met sy vrou, Elize, sy dogtertjies, Mia en Emma, drie honde, ’n kat en ’n troetel-luislang. Zinelda McDonald is 'n kunstenaar met 'n honneursgraad in grafiese ontwerp van die Noordwes-Universiteit se Potchefstroom-kampus, en sy illustreer meestal kinderboeke en ontwerpe omslag vir romans vir jong volwassenes. Sy het verskeie toekennings vir haar werk ontvang.