Harlekyn

As jy een van die mense is met ’n vrees vir narre, sal ek voorstel dat jy eerder verby hou. Jaco Jacobs het my behoorlik bang geskryf met Harlekyn, wat nou spog met ’n splinternuwe baadjie.
Werner het ’n slegte skrik gekry by die sirkus toe het ses jaar oud was. Sederdien is hy baie bang vir hansworse. Soveel so dat hy nagmerries kry daarvan. Wanneer sy irriterende suster ’n antieke nar in ’n houtdosie koop en huis toe bring, begin vreemde en vreesaanjaende dinge gebeur. Dit help ook nie dat ’n oom wat speelgoed herstel, vertel van ’n ene Roberto Collodi wat die gesogte pop gemaak het, terwyl hy eintlik ’n moordenaar was nie.
Dit het my laat dink aan skrywer, Carlo Collodi, wat vir Geppeto geskep het, wat op sy beurt vir Pinochio gemaak het. Gelukkig was dit ’n baie minder geweldadige storie.
Die storie was aanvanklik ’n vervolgverhaal in ’n dagblad en het in 2010 in boekvorm verskyn. Die 2025 weergawe is uitgegee deur Human & Rousseau, ’n druknaam van Jonathan Ball Uitgewers. Dit is geskik vir selfstandige lesers van ongeveer 9 tot 12 jaar, wat dapper genoeg is om ’n bose nar te trotseer.