Agent Snoet 5-in-1

Spannende strokiesprent-pret saam met Agent Snoet en sy kat ... Sy naam is Snoet. Agent James Snoet. En hy is ’n speurder. Die soort wat leidrade uitsnuffel en allerlei ingewikkelde raaisels oplos.  Maar die eintlik meesterbrein agter dié suksesvolle speurder is niemand anders nie as sy kat, Felino. Dié slim Siamees is ’n katjie wat jy nie sonder handskoene moet aanpak nie. Hy mag nou wel reeds agt van sy nege lewens verloor het, maar Felino skrik vir net mooi niks! En dis ook maar goed so, want agent Snoet is so verstrooid dat hy net mooi niks sonder sy getroue kattehandlanger sou uitrig nie! Saam het dié gedugte speurderspan al die geheim agter die verdwyning van die kosbare Botterdiamant ontrafel, ’n gevaarlike wapen genaamd die Genugtig uit gevaarlike skurke se kloue teruggekry en ’n BBH (Baie Belangrike Hond) se lewe beskerm.  Vir die eerste keer verskyn al vyf boeke in dié fantastiese strokiesreeks nou saam in een boek: Agent Snoet en die Botterdiamant Agent Snoet en die Kattekwaad Agent Snoet en die Hondelewe Agent Snoet en die Groen Genugtig Agent snoet en die Windlawaai 

Francois Bloemhof is een van die veelsydigste en gewildste skrywers in Afrikaans, met talle boeke vir volwassenes, tieners en kinders op sy kerfstok. Hy is verskeie kere bekroon, onder meer met die Sanlamprys vir Jeuglektuur (twee maal), vier ATKV-Kinderboektoekennings en die De Kat-prys. Hy woon in Kaapstad. Alistair Ackermann werk reeds meer as tien jaar as vryskut-illustreerder en fokus hoofsaaklik op kinderboeke en opvoedkundige publikasies. Hy het al ATKVKinderboektoekennings vir sy illustreerwerk ingepalm met Agent Snoet en die Groen Genugtig (2001), Cowboy Koekemoer van die Klein Karoo en sy getroue kameelperd, Shorty (2011) en Cowboy Koekemoer van die Klein Karoo en die seerower van Watsenaam (2013).