Laaste lewe

Hierdie epiese grafiese roman is gebaseer op Fanie Viljoen se roman The Last Time I Died wat in 2016 deur Ransom Publishing gepubliseer is.Die Swart Kraai het Sam se pa doodgemaak, en nou het hy Sam doodgemaak. Sam is egter nie dood nie. Die dood was die sesde van sy sewe lewens, en nou het hy nog een oorblywende lewe - om terug te kom en Die Swart Kraai dood te maak. Die meesterlik kreatiewe Daniël Hugo het hierdie boek geïllustreer en lesers met 'n voorliefde vir die kuns van grafiese romans en strokiesprente sal weggeblaas word deur die besondere details van die illustrasies op elke bladsy.

Fanie Viljoen is een van die mees geliefde en diverse Afrikaanse kinder- en jeugboekskrywers. Sy boeke BreinBliksem en Onderwêreld is albei met die Sanlamprys vir Jeuglektuur bekroon, hy het al ’n rits ATKV-Woordveertjies en ’n M.E.R.-prys ingepalm. Sy verhale Betower en Afkop was naaswenners in LAPA se jeugromankompetisie en in 2019 wen hy met Offers vir die vlieë. Daniël Hugo is 'n vryskut-illustreerder en konsepkunstenaar in Kaapstad. As hy nie besig is om as storiebordkunstenaar vir advertensie-agentskappe te werk nie, werk hy aan privaatkommissies en kreatiewe samewerkings wanneer die geleentheid hom voordoen. Hy het die afgelope dekade 'n bydrae gelewer tot 'n aantal onafhanklike Suid-Afrikaanse strokiesprente as kunstenaar en skrywer, mees onlangs aan Sector, 'n tweemaandelikse fantasie- en wetenskaplike strokiesprentboek.