Djin in 'n koffiekan

Clea Cilliers, student en entrepreneur, wag nie vir ’n djin in ’n lamp om haar wense te bewaarheid nie. Sy gebruik haar erfgeld om ’n baristafiets en koffiepitte te koop sodat sy aan haar oorbeskermende broers kan bewys sy kan op haar eie voete staan. Bedags is sy barista by haar koffiestasie in die middestad sodat sy saans lesings kan bywoon vir haar BA-graad. Pierre Grundling se besigheidsaanbod wat die geleentheid insluit om ’n agtiende-eeuse dagboek in Afrikaans te vertaal, verander alles. Haar lewe raak so vervleg met die avonture van die dagboekskrywer en die ontstaan van die koffiekultuur, dat sy begin vermoed dat koffie dalk wel ’n towerdrankie is.

p>Bets het begin skryf omdat sy in die liefde glo en wou bewys sy kon die storie wat binne broei op papier kry. Deesdae skryf sy omdat sy nie anders kan nie, want dis bevredigend om karakters te skep, navorsing te doen en gelukkige eindes te bewerkstellig. Sy en haar man is sedert 2018 dolgelukkig in die Suidkaap waar sy voltyds kan skryf omdat inspirasie volop is. Die natuur, ’n man wat haar verstaan en ondersteun, twee getroude kinders en vyf kleinkinders, werk saam om die stories te laat vloei.