'n Skuilplek vir Sofie

’n Boek deur Elsa Winckler sal jy binne bladsye kan herken selfs sonder insae in die skrywer se naam of die buiteblad. ’n Skuilplek vir Sofie is geen uitsondering nie. Van meets af aan is daar konflik tussen kolonel Wessel Jordaan en Sofie Olivier, maar ook onbehoorlike aantrekkingskrag.
Die skrywer se huidige reeks, waarvan hierdie die vierde aflewering is, bied buiten die gewone hormone, struweling, familie wat inmeng en vooropgesette idees oor die huwelik, nog ’n goeie dosis spanning. Die rolspelers is lede van Bosman Sekuriteite en as sulks is hulle aan gevaarlike situasies blootgestel.
Wessel probeer verbete om vir Sofie te beskerm terwyl ’n lid van sy span in die polisie inligting lek wat hulle telkens in die spervuur laat. Hulle is op die spoor van ’n berugte en gevaarlike swendelaar wat in Kaapstad opgemerk is en die situasie is vinnig lewensbedreigend. Die feit dat Sofie, ook ’n agent van Bosman Sekuriteite, ongeneë is om sy hulp te aanvaar, kompliseer sake nog verder.
As jy graag die reeks in volgorde wil lees, kyk uit vir Om Karlien te beskerm, Om Isla op te pas en Om Leah veilig te hou, nou opgevolg deur ’n Skuilplek vir Sofie.