Raaiselman

Daar is meerdere raaisels betrokke in Salma Swanepoel se nuutste Romanza, Raaiselman. Daar is ’n raaiselagtige man wat by die skoonheidsalon van Alana en haar vriendinne opdaag vir behandelings. Daar gebeur ook vreemde dinge wat die reputasie van hulle salon kan skade berokken. Om die intrige aan te help, gebeur die snaakse dinge juis in die tyd wat Roux begin opdaag vir behandelings.
Nodeloos om te sê, word daar erg bespiegel en gesoek na verklarings. Hierdie feitestel het die skrywer ook knap gebruik om ’n baie oorspronklike en lekker misverstand te skep wat die potensiaal het om die nuwe verhouding heeltemal te kelder.
Een klein punt van kritiek: dit is myns insiens altyd ’n risiko om name te kies wat verwarring kan veroorsaak by die leser. Daar is byvoorbeeld ’n mevrou Egling en mevrou Neveling (p.14) wat my twee maal laat lees het om seker te maak daar is twee persone ter sprake. Om verder ’n rits karakters te hê met “a”-klanke, Alana, Sanja, en Adel, tart ook die drukkers- en skrywersduiwel. Op bladsy 85 lees ons van Lara in plaas van Alana. My vermoede is dat hierdie fout misgekyk is in die redigering, juis omdat daar soveel name is wat byna eenders is.
Die klein mistasting doen gelukkig geen afbreuk aan die heerlike romanse en die gelukkige einde nie.