Skattejag en skadukante

Ervare skrywer wat sy is, het Malene Breytenbach haar lesers al saamgeneem na die Amasone, na hospitaalsale, na die oorlogsfront. Daar is al gedraai in Egipte, by argeologiese opgrawings. Nou verras sy weereens wanneer die milieu verskuif na die skip van ’n marine-argeoloog wat soek na artefakte en hopelik ook waardevolle skatte, in ’n wrak waarna Rowan Carter lank gesoek het. “Ons werk gaan nie net oor skatte soek nie. Ons diep verhale op uit die see, stukkie vir stukkie.” (p.186)
Elara Steyn word saamgenooi op die ekspedisie, klaarblyklik ’n bron van argwaan vir die knorrige Rowan. Sy is die teenpool van haar borrelende suster, wat in ’n verhouding is met Dante, ’n voormalige duikinstrukteur wat nou werk vir Rowan.
Die romanse lees byna soos ’n spanningsverhaal, kompleet met ’n klomp skurke, gedryf deur geldgierigheid. Die vind van waardevolle skatte, bring die skadukant van mense na vore, soos dit duidelik word uit die gebeure.
Die verhouding tussen Elara en Rowan vorder stadig om tred te hou met Rowan se transformasie van ongedurig na beskermend en uiteindelik, liefdevol. Skattejag en Skadukante sorg vir ’n paar ure se leesgenot.