Geheim in die Riete

Kruhan Malherbe is ’n tipiese twaalfjarige wat saam met sy ouers in met ’n ou Pajero en ’n karavaan van plek tot plek deur Suid-Afrika reis en vir tye staan in karavaanparke. Die storielyn is heel kontemporêr in terme van sy ouers se beroepe wat hulle aanlyn kan beoefen en Kruhan wat ’n internasionale skoolsyllabus volg. En ook tipies van ’n knaap van sy ouderdom, volg hy nie altyd opdragte en waarskuwings nie, en is hy soms krities, teleurgesteld en verveeld met sy ouers.
Die storie skop af wanneer die gesin by Kebospark kamp opslaan, ’n vervalle karavaanpark waar vreemde karakters woon. Gou blyk dit dat die rietbos, die strandmeer en die nagapies buitengewoon is. Die skrywer verweef die magiese, die mitiese en spanningselemente vernuftig om met ’n boeiende storielyn vorendag te kom. Ek is baie ouer as die aanbevole lesers van 12 jaar en ouer, maar ek het sommer baie gretig gelees aan hierdie jeugverhaal.
In kinder- en jeugverhale soek ek altyd na brokkies lewenswysheid wat aan die lesers oorgedra kan word deur middel van ’n storie. Geheim in die riete slaag puik daarin. Wat is meer heilsaam as ‘n seun wat dapper verantwoordelikheid aanvaar vir ander se veiligheid, wat misleiding raaksien en na waarde beoordeel, en besef hoe belangrik sy ouers in werklikheid vir hom is.
Constant van Graan het bekendheid verwerf vir sy Jungu Josh reeks en aanhangers behoort hierdie nuwe boek ook te geniet.