’n Ierse knoop

Toe die vier Ierse O’Connor-broers, Sullivan, Declan, Liam en Rooney, besluit om ’n volhoubare ontwikkeling op Fynbosbaai bou, loop hulle hulle vas in Anke Joubert en haar vriendinne, kampvegters vir die omgewing.Anke, ’n akademikus, skryf oor die perlemoenstropers in die omgewing. Miné du Toit plaas foto’s van bedreigde spesies op sosiale media. Eden Fourie probeer deur haar kuns mense bewus maak van die broosheid van die Biosfeer. En Lika Bester, skrywer en eienaar van die plaaslike boekwinkel ondersoek die verdwyning van ’n skooldogter ’n jaar tevore. Hou dit met die stropery verband? Hoe meer vrae die vriendinne vra, hoe meer dreigemente ontvang hulle.Toe die eerste slote vir die Ierse broers se ontwikkeling gegrawe word, kom hulle op menslike oorblyfsels af. Is dit die vermiste skoolmeisie, of ’n ander slagoffer van vuilspel?

Elsa Winckler skryf sedert 2008 nadat sy haar honneurs in Engels voltooi het. Tydens haar kursus “ontmoet” sy klassieke skrywers soos Jane Austen en die Brontë-susters, en kan uiteindelik die stories neerskryf wat al van kleintyd in haar kop draai.Sy is dol oor haar kinders en kleinkinders en niks verskaf vir haar groter vreugde as om kos te maak vir haar geliefdes nie.Daar het reeds 60 Afrikaanse stories uit haar pen verskyn, sowel as 17 in Engels, 2 kinderboeke en vele kortverhale. Vier van die haar liefdesverhale het ATKV-Woordveertjies gewen.